ТИМОВИ ОД ПЛАСТИЧНА ХИРУРГИЈА, ХЕМАТОЛОГИЈА И „ЖИВОТ СО ПРЕДИЗВИЦИ“ ЌЕ ТРЧААТ НА СКОПСКИОТ МАРАТОН ЗА ХУМАНИТАРНИ КАМПАЊИ

    ТИМОВИ ОД ПЛАСТИЧНА ХИРУРГИЈА, ХЕМАТОЛОГИЈА И „ЖИВОТ СО ПРЕДИЗВИЦИ“ ЌЕ ТРЧААТ НА СКОПСКИОТ МАРАТОН ЗА ХУМАНИТАРНИ КАМПАЊИДел од тимот на Клиниката за пластична и реконструктивна хирургија, кој на Скопскиот маратон ќе трча со порака да не бегаме од сонцето, но да се заштитиме, со што почнува кампањата за подигање на свеста за меланом, еден од типовите рак на кожа (Фото: СДК.МК)

    Во рамки на утрешниот Скопски маратон, дел од клиниките и здруженијата на пациенти со свои тимови ќе трчаат за да се подигне свеста за превенција, третман и поддршка на болни. Клиниката за пластична и реконструктивна хирургија со тим од 35 вработени, доктори, специјализанти и останат здравствен кадар ќе трча на маратонот, со порака дека навремената дијагноза на меланомот, еден од видовите рак на кожа, може успешно да се лекува.

    Директорката на Клиниката за пластична и реконструктивна хирургија д-р Софија Пејкова вели дека токму со тоа што ќе трчаат на маратонот сакаат да покажат дека не треба да се плашиме и да се криеме од сонцето, но дека треба луѓето да бидат заштитени на секое подолготрајно изложување на сончевите зраци, а од друга страна пак да ја зголемат свеста кај луѓето дека навреме треба да појдат на лекар и да се прегледааат.

    Клиниката за хематологија исто така ќе учествува со свој тим на маратонот, а во паркот Жена-борец ќе имаат и штанд за запишување во националниот регистар за дарители на коскена срцевина, што е дел од кампањата за подигање на јавната свест „Биди срцевина, биди херој“. Секој ќе може да се запише во регистарот и да даде крв, која потоа ќе биде тестирана и ќе влезе во регистарот на дарители.

    Здружението на граѓани за ретки болести „Живот со предизвици“ во соработка групата „Скопско ноќно трчање“ ќе има 50 учесници кои ќе трчаат за лицата со ретки болести на 5, 21 и 42 километри-штафета. Весна Алексовска од здружението „Живот со предизвици“ вели дека годинва ја подигаат свеста за лицата со ретки болести за кои во светот не постои терапија.

    Е. БОЧВАРОСКА

    ЧИТАЊЕТО Е БЕСПЛАТНО.

    АМА НОВИНАРСТВОТО НЕ Е.

    Поддржете го слободното, независно, професионално новинарство. Новинарство со интегритет.

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира