САД се обидуваат да запленат нафтен танкер под руско знаме со врски со Венецуела, по повеќе од двонеделна потера низ Атлантикот и во момент кога руска подморница и воен брод се наоѓале во близина, изјавија денеска две американски официјални лица за Ројтерс. Заплената, која би можела да ги зголеми тензиите со Русија, следеше откако танкерот, првично познат како „Бела-1“ кој е празен, се протнал низ американската поморска „блокада“ на санкционирани танкери и ги одбил обидите на американската Крајбрежна стража да се качи на бродот. Официјалните лица, кои зборуваа под услов на анонимност, изјавија дека операцијата ја спроведуваат Крајбрежната стража и американската војска.
Се чини дека ова е првпат во поновата историја американската војска да се обиде да заплени пловен објект под руско знаме. Службениците додадоа дека руски воени пловила се наоѓале во пошироката област на операцијата, меѓу нив и руска подморница. Не беше јасно колку блиску биле пловилата до самата операција, која се одвивала во близина на Исланд.
Американската Крајбрежна стража првпат се обидела да го пресретне пловниот објект минатиот месец, но тој одбил да дозволи качување на бродот. Оттогаш, тој е регистриран под руско знаме.
Танкерот, сега познат како „Маринера“, е најновиот танкер што е цел на американската Крајбрежна стража од почетокот на кампањата на притисок на американскиот претседател Доналд Трамп против Венецуела. Бродот беше санкциониран од САД во 2024 година поради наводен шверц на товар за компанија поврзана со либанската милитантна група Хезболах.
Одделно, американската Крајбрежна стража исто така пресретнала уште еден танкер поврзан со Венецуела во водите на Латинска Америка, изјавија американски официјални лица за Ројтерс, додека САД продолжуваат да спроведуваат поморска „блокада“ на санкционирани пловни објекти од Венецуела.
Овие потези следат само неколку дена откако американските специјални сили се спуштија во Каракас пред зори на 3 јануари, во смртоносна рација за да го запленат претседателот Николас Мадуро и да го однесат во САД. Американската војска го предаде на федералните власти за кривично гонење по обвиненија поврзани со наводна трговија со дрога.
Високи венецуелски официјални лица го нарекоа апсењето на Мадуро киднапирање и ги обвинија САД дека се обидуваат да ги украдат огромните нафтени резерви на земјата, за кои се проценува дека се најголеми во светот. Од друга страна, Трамп и високи американски официјални лица ја обвинија Венецуела дека краде американска нафта, во очигледна референца на национализацијата на енергетскиот сектор на земјата во неколку бранови во текот на изминатите половина век.
