Поранешната австриска министерка за надворешни работи Карин Кнајсл, која танцуваше со Владимир Путин на својата свадба во 2018, се пресели во Санкт Петербург, каде што ќе води истражувачки институт. Педесет и осумгодишната Кнајсл објави на Телеграм дека заминала за Русија заедно со своите коњчиња. Тие досега биле чувани во Сирија, а во Русија биле превезени со руски воен авион.

Кнајсл беше министерка од 2017 до 2019 како кадар на крајнодесничарската Слободарска партија и во тоа време често беше критикувана за своите проруски ставови.

„Во јуни 2022 се преселив од Марсеј во Бејрут сосе моите книги, облека и коњчиња откако бев избркана од Франција. Во Санкт Петербург го основав центарот ‘Горки‘ и одлучив да се преселам во Русија зашто работата во овој институт ми одзема многу време“, изјави Кнајсл за време на Источниот економски форум во Владивосток, на кој учествуваше и Путин.

Според неа, центарот „Горки“ се бави со прашања како енергетика, миграција и нови сојузи.

„Бидејќи во Германија и Австрија ништо не се случува покрај економската криза, мојата преселба стана политичко прашање“, кажа таа.