Новоизбраниот претседател Џо Бајден ќе побара од Американците да носат маска во првите 100 дена од неговиот мандат со цел да се спречи ширењето на коронавирусот. Ова следува истиот ден кога беше објавено дека бројот на хоспитализирани лица со ковид-19 се искачи на 100.000.

„Верувам дека ќе има значително намалување на ширењето на коронавирусот ако секој Американец има покриено лице“, изјави Бајден, додавајќи дека ќе нареди да се носи маска во сите владини згради.

Во САД досега има 14,1 милион заразени и 276.000 починати од ковид-19 и Бајден се подготвува да ја преземе власта додека фармацевтските компании се подготвуваат да испорачаат милиони дози од вакцините.

„Првиот ден по инаугурацијата ќе побарам од јавноста да носи маска 100 дена. Само 100 дена, не засекогаш. Во комбинација со вакцинирањето, мислам дека така ќе видиме значително намалување на ширењето на заразата“, изјави Бајден.

Уставните експерти велат дека Бајден нема законска можност да им нареди на Американците да носат маска, додека за федералните згради и имоти може да издаде таква извршна наредба и кажа дека ќе го направи тоа.