Белата куќа планира да го замени државниот секретар Рекс Тилерсон со Мајк Помпео, јавуваат американските медиуми и претседателот Доналд Трамп неубедливо го демантираше тоа.

„Тој е овде, Рекс е овде“, им одговори Трамп на новинарите.

Сличен одговор дојде и од Стејт департментот:

„Господинот Тилерсон продолжува да го води Стејт департментот и во овој момент нема најави за смени во персоналот“.

Познато е дека Тилерсон има несогласувања околу надворешната политика со Трамп, кого наводно во приватен разговор го има наречено „морон“. Нивните размислувања особено се разликуваат околу пристапот кон севернокорејското прашање и кон нуклеарната програма на Иран.

Две официјални лица од Белата куќа ѝ потврдиле на агенцијата АП дека за овој план се дискутира и дека промената ќе биде извршена идниот месец или најдоцна во јануари.

Мајк Помпео е актуелниот директор на ЦИА, каде што се очекува да биде заменет со републиканскиот сенатор Том Котон.