Жителите на Киев собираат снег за вода дома, спијат со ракавици, капути и капи, се греат на гасни шпорети и поставуваат шатори внатре за да ја преживеат најстудената и најтемна зима во речиси четиригодишната војна.

„Кога нема електрична енергија, нема ни греење, тоа значи дека станот замрзнува“, рече Антон Рибиков, татко на две мали деца.

Тој рече дека еден од неговите синови неодамна добил пневмонија откако температурите во станот паднале на девет степени за време на 19-часовен прекин на електричната енергија по руските воздушни напади.

„Емоционално е многу тешко. Оваа зима е најтешка“, вели Рибиков.

Русија ги засили нападите врз енергетската инфраструктура на Украина во последните месеци, концентрирајќи ги ракетите и дроновите врз градовите Киев, Харкив и Днипро. Британската воена разузнавачка служба процени дека Русија минатата година лансирала 55.000 беспилотни воздушни системи кон Украина, околу петпати повеќе во споредба со 2024.

Со пад на температурите до -18 степени во Киев, стотици илјади од трите милиони жители се борат со долги периоди без електрична енергија и вода. По вчерашниот голем руски напад, претседателот Володимир Зеленски рече дека повеќе од еден милион домаќинства во градот немаат струја.

Едноставните рутини како туширање и готвење сега се предизвик. За првпат од почетокот на војната, владата минатата недела прогласи вонредна состојба поврзана со енергетската криза.

Русија вели дека нападите врз Украина се со цел да се деградира нејзината војска и негира дека се насочени против цивили.

„Нападите врз Киев имаат за цел да скршат отпор, да го скршат духот на Украинците, да направат сè за луѓето да станат депресивни и да ги спакуваат своите куфери и да си заминат. Киев отсекогаш бил и останува цел на агресорот“, вели градоначалникот на Киев, Витали Кличко.

Низ целиот град, илјадници луѓе сега се собираат во училиштата и на импровизираните улични „точки на непобедливост“, каде што генераторите им овозможуваат да се затоплат, да ги полнат своите телефони и да се поврзат на интернет.

Руските напади врз енергетскиот систем сега предизвикуваат прекини во снабдувањето со електрична енергија и вода во Киев кои обично траат три-четири пати подолго од претходните зими.

„Не се жалиме. Разбираме дека се води војна и дека мора да издржиме. Мора да преживееме“, рече пензионерката Валентина Кирилакова.