Американскиот државен секретар Антони Блинкен ја заврши својата деветта посета на Блискиот Исток од почетокот на војната во Газа, без да обезбеди голем напредок за договор за прекин на огнот, a вчера предупред дека „времето е од суштинско значење“ иако Хамас и Израел сигнализираа дека и натаму остануваат предизвиците. По состаноците во другите земји-посредници, Египет и Катар, Блинкен рече дека бидејќи Израел го прифатил предлогот за премостување на јазот со милитантната група, фокусот е свртен кон тоа да се направи се што е можно за „да се вклучи Хамас“ и да се осигура дека двете страни ќе се согласат со клучните детали за имплементација.
„Нашата порака е едноставна. Јасно е и итно е“, изјави тој пред да замине од Катар. „Треба да постигнеме прекин на огнот и договор за заложниците, и тоа треба да го направиме сега. Времето е од суштинско значење“.
Дополнителна итност се појави по неодамнешните насочени убиства на милитантните водачи на Хамас и Хезболах во Иран и Либан, обете му се припишуваат на Израел, и ветувањата за одмазда што предизвикаа стравувања од поширока регионална војна. Објавени се неколку детали за таканаречениот предлог за премостување што го изнесоа САД, Египет и Катар. Блинкен рече дека е „многу јасен распоредот и локациите на (израелската војска) за повлекување од Газа“.
Хамас вчера го нарече последниот предлог пресврт на она на што се согласи, обвинувајќи ги САД дека се согласуваат со новите услови од Израел. Немаше веднаш одговор на САД на тоа. Коментарите на Блинкен за завршувањето на неговата последна мировна мисија меѓу Израел и Хамас беа без оптимизмот што претставниците на администрацијата на Бајден го изразија при неговото патување, но и порано.
