Претседателката на српската влада Ана Брнабиќ изјави дека косовскиот премиер Албин Курти ги довел Србите и Албанците до работ на војна и најави дека Србија е близу одлука да побара враќање на своите сили во Косово.
„Секој ден се кршат и бриселскиот и кумановскиот договор. Блиску сме, согласно Резолуцијата 1244 на Советот за безбедност на Обединетите нации, да побараме враќање на нашите сили во Косово затоа што КФОР и Еулекс не си ја вршат работата и не ги штитат Србите јужно и северно од реката Ибар. Србите не се чувствуваат безбедно и физички и животно се загрозени“, кажа Брнабиќ, додавајќи дека денеска ќе му ги изнесе деталите на претседателот Вучиќ.
Таа оцени дека сè што прави Курти е опасност за Србите, Албанците, па и за Европа.
„Тоа е политика од 18. и 19. век. Многу сум загрижена и лошо спиев ноќеска“, кажа српската премиерка и го обвини Брисел дека не реагира и дека му е партнер на Курти.
Во трите мултиетнички населби во северниот дел на Косовска Митровица денеска е мирно откако таму синоќа упаднаа стотици припадници на косовската полиција. Обвинувајќи го Курти дека сака да го окупира северот на Косово, Белград објави дека е подготвен да испрати илјада војници во Косово и Метохија. Приштина појасни дека испраќањето на полицијата имало за цел да го зајакне нејзиното присуство во деловите на градот во кои живее етнички мешано население.
