Унгарецот Ласло Трочањи нема да биде нов еврокомесар за проширување откако неговата кандидатура беше одбиена од Европскиот парламент поради конфликт на интереси, што се смета за голем удар за Виктор Орбан.

На сослушувањето на кое што требаше да биде потврден изборот на Трочањи, кој е поранешен министер за правда на Унгарија, било кажано дека има недоследности во неговите финансии, поради што тој беше блокиран. Овие сослушувања се предуслов за официјално потврдување на предложените кандидати за комесари и освен Трочањи, не помина ни кандидатката на Романија за функцијата комесар за транспорт.

Трочањи, кој требаше да го наследи Јоханес Хан, беше министер за правда од 2014 до 2019 година и иако не е член на владејачката партија Фидес, тој ја предводеше нејзината листа на последните избори за Европски парламент и важи за лојален на премиерот Орбан.