Кривичниот суд во Париз осуди четворица бугарски државјани на затворски казни за сквернавење на еврејски споменик со црвени отпечатоци од дланки минатата година, во случај за кој обвинителството се сомнева дека е дел од операција за странско мешање поврзана со Русија.
Георги Филипов и Кирил Милушев, опишани како директни извршители, добија затворски казни од две години, додека Николај Иванов и Мирчо Ангелов, кои се сметаат за „мозоци“ на операцијата, се осудени на четири, односно три години затвор. Ангелов сè уште е во бегство. На сите четворица им е изречена и доживотна забрана за влез на француска територија.

Ова е прво судење од ваков вид во Франција, кое се однесува на серија слични инциденти за кои постои сомнеж дека се оркестрирани од странска сила со цел да се дестабилизира земјата.

Иако на обвинетите не им се судеше за делување во име на странска сила, бидејќи таа отежителна околност била внесена во кривичниот законик на Франција по инцидентот, судиите изјавија дека фактот што имало странско мешање е „неспорен“. Според судот, целта била „да се разгори јавното мислење, да се искористат постоечките поделби и дополнително да се фрагментира француското општество“.

Вандализмот се случи во време на зголемени тензии во Франција поради војната меѓу Израел и Хамас. На ѕидот што беше осквернавен се испишани имињата на 3.900 луѓе кои се одликувани за заштита на Евреите за време на нацистичката окупација на Франција во Втората светска војна.

Истражителите ги идентификувале сторителите преку снимки од безбедносни камери, по што откриле дека тројца од нив следното утро со автобус заминале за Белгија, а потоа со лет за Бугарија.

За време на судењето, присутните обвинети ја префрлаа вината на нивниот отсутен соучесник Ангелов, нарекувајќи го „водач“ и негирајќи каква било идеолошка мотивација. Филипов тврдеше дека не бил свесен оти го вандализира споменикот, познат како „ѕидот на праведните“. Тој, исто така, ги отфрли обвинувањата дека неговото регрутирање е поврзано со неговите очигледни неонацистички афилијации, вклучително и тетоважа со свастика и фотографии на социјалните мрежи на кои прави нацистички поздрави, тврдејќи дека го оставил тоа минато зад себе.

Париското обвинителство соопшти дека инцидентот со црвените дланки, кој е можно да бил „оркестриран од руските разузнавачки служби“, е еден од деветте слични сомнителни акти на странско мешање. Француската агенција за следење на странско мешање на интернет, Вигинум, соопшти дека инцидентот бил искористен и засилен на социјалната мрежа „Икс“ од страна на „актери поврзани со Русија“.