Десет луѓе загинаа по пукањето на австралиската плажа Бонди, потврди полицијата на Нов Јужен Велс. Меѓу загинатите се девет жртви и еден напаѓач. Во инцидентот се повредени и двајца полицајци.

Според првичните информации, еден маж за кој се верува дека е напаѓач е убиен, додека друг наводен напаѓач е во критична состојба.

Полицијата соопшти дека за време на истрагата биле лоцирани „голем број сомнителни предмети“ во областа, кои сега се вештачат од специјализирани службеници. Воспоставена е зона на исклучување и обезбедено е обемно место на злосторство.

„Во тек се истраги. Нема извештаи за какви било други инциденти во Сиднеј поврзани со овој настан“, велат од полицијата.

Во меѓувреме, се појави видео снимка на која се гледа како граѓанин се справува со еден од вооружените напаѓачи. На снимката се гледа како мажот го напаѓа вооруженото лице одзади, се бори со него и успева да му го одземе оружјето, по што го врти оружјето кон напаѓачот и го принудува да се повлече.

Инцидентот на видеото се случува на помалку од 50 метри од пешачкиот мост каде што претходно биле забележани напаѓачи како пукаат, и каде што најмалку еден од нив загина по престрелка со полицијата.

Откако го совлада напаѓачот, граѓанинот го спушти оружјето и ги крена рацете во вис за да ѝ покаже на полицијата дека тој не е еден од напаѓачите. На видеото се гледа и како полицаец пристигнува на местото и отвора оган кон осомничените.