Британскиот премиер Борис Џонсон е во стабилна состојба и прима стандарден третман со кислород, информираше министерот за надворешни работи Доминик Раб.

„Сигурен сум дека тој ќе се извлече бидејќи ако нешто знам за нашиот премиер, тоа е дека е голем борец. Неговата болест ги шокираше сите во кабинетот. Тој не е само наш шеф, туку и колега и пријател“, изјави Раб, кој раководи со владата во отсуство на Џонсон.

Џонсон (55) синоќа беше префрлен на интензивна нега во лондонската болница „Сент Томас“ откако му се влошиле симптомите на коронавирусот. Од владиниот кабинет кажаа дека тој е свесен, во добро расположение и не е приклучен на респиратор.

„Џонсон ја има најдобрата можна грижа од извонреден лекарски тим. Сите му посакуваат брзо заздравување“, додаде Раб.