Роднини и пријатели повторно ќе смеат да се гушкаат и да се мешаат на отворено од идната недела, а баровите, кината и театрите ќе бидат целосно отворени во следната фаза од укинувањето на рестриктивните мерки во Велика Британија, и покрај грижите околу појавата на новиот индиски сој. Научниците предупредија дека бројот на нови случаи на коронавирус се удвоил во некои области, каде што е забележана оваа нова варијанта.

На денешната прес-конференција, премиерот Борис Џонсон ќе прогласи успех на програмата за имунизација против ковид-19, откако две третини од возрасното население примиле една доза, а една третина е целосно вакцинирана. Вчера биле регистрирани само два смртни случаи од ковид-19.

Следната фаза од олеснувањето на коронамерките почнува на 17 мај, кога се отвораат културните установи и сместувачките капацитети, а на луѓето од две различни домаќинства ќе им биде дозволено да седат во ресторан и бар во затворено. Планирано е да се обноват и меѓународни патувања, при што некои дестинации ќе добијат зелено светло, како Австралија, Нов Зеланд и Израел.

Домашните експерти велат дека земјата успешно се справила со британскиот сој на коронавирусот, но нови непријатности создава индиската варијанта.