Два товарни брода утрово се судрија во Балтичкото Море покрај брегот на Шведска, по што едно од пловилата се превртело, објавија шведските медиуми. Се стравува дека има луѓе во водата и во моментов трае акција на спасување.

Еден брод е регистриран на Данска, а другиот е британски. Нејасно е како дошло до судирот и колку луѓе имало на двата брода. Инцидентот се случил во областа меѓу јужниот шведски крајбрежен град Истад и данскиот остров Борнхолм.

Портпаролот на Шведската поморска агенција, Јонас Францен, изјави дека превртениот брод е дански и дека во неговата посада биле двајца луѓе, чија судбина е непозната. Британскиот брод и натаму бил функционален.

„Примивме информации дека се слушаат вресоци од водата. Досега никој не е пронајден. Во тие води е многу мрачно и студено. Повикани се нуркачки екипи“, кажа Францен.

Во потрагата се вклучија и хеликоптери и десетина чамци од Шведска и Данска.