Регулаторното тело денеска одобри употреба во итни случаи на експерименталната терапија со антитела на компанијата „Регенерон“ за случаи на коронавирус со лесна и умерена клиничка слика. Оваа терапија му беше даде и на американскиот претседател Доналд Трамп во октомври.

Терапијата е коктел од два типа моноклонални антитела, кои го имитираат природниот одговор на имуниот систем против вирусот. Употребата во итни случаи се однесува на возрасни и на деца над 12 години со благи до умерени симптоми на ковид-19, но постои голем ризик болеста да прогресира и да е потребна хоспитализација. Експерименталната терапија не е одобрена за употреба кај пациенти кои се веќе хоспитализирани или се на кислородна поддршка.

Според податоците од клиничките тестови, објавени од „Регенерон“, терапијата го намалува количеството вирус во телото и може да го забрза закрепнувањето.

„Со одобрувањето на овие терапии со моноклонални антитела може да им се помогне на пациентите да избегнат хоспитализација и да се намали притисокот на нашиот здравствен систем“, соопштија од Администрациjата за храна и лекови (ФДА).

„Регенерон’ вели дека има доволно дози од терапијата за 80.000 луѓе до крајот на месецов, а до почетокот на јануари очекува да има дози за вкупно 200.000 пациенти.