Финската премиерка Сана Марин се извини што отишла на забава во ноќен клуб откако имала близок контакт со лице заразено со коронавирус. Таа излегла во град во саботата вечер неколку часа откако министерот за надворешни работи имал позитивен тест.

На Марин првично ѝ било кажано дека не мора да оди во изолација зашто е вакцинирана со две дози, за потоа да не ја види пораката дека сепак мора да се изолира. Триесет и шестгодишната социјалдемократка кажа дека пораката ѝ била пратена на службениот телефон, што го оставила дома. Кога ја видела пораката следниот ден, веднаш се тестирала и резултатот бил негативен.

„Требаше да направам подобри проценки и да ги проверам препораките. Се извинувам што не сфатив дека треба да го направам тоа“, напиша Марин на Фејсбук.

Според финските препораки за заштита од ковид-19, секој што е вакциниран со две дози не мора да оди во изолација ако имал контакт со заразено лице. Но, луѓето исто така се советуваат да избегнуваат социјален контакт ако го чекаат резултатот од ковид тестот.

Марин се соочи со силни критики откако еден таблоид објави фотографии како се забавува во ноќен клуб во Хелсинки, каде што, според очевидците, останала до четири часот.