„Фолксваген“ размислува да затвори четири германски фабрики и да отпушти речиси 100.000 вработени, изјавија две лица запознати со ова прашање, што би можел да биде најголемиот ремонт во автоиндустријата досега. Членовите на надзорниот одбор биле информирани за плановите, за кои треба да се разговара на состанокот на 9 јули.

Овој потег доаѓа во време кога германскиот гигант се соочува со зголемен притисок од кинеските конкуренти, строги царини за увоз на автомобили во САД и со намалена побарувачка во Европа, што, според компанијата, го прави нејзиниот бизнис модел неодржлив.

„Фолксваген“ денеска потврди дека работи на иден план за реструктурирање, но додаде дека во оваа фаза не сака детално да ги коментира извештаите за построги мерки за намалување на трошоците.

Затворањето на фабриките во Хановер, Цвикау, Емден и Некарсулм би довело во опасност повеќе од 45.000 работни места, според изворите. Тие би се додале на 50.000 отпуштања, што првично биле планирани.

Списанието „Менаџер“ објави дека вториот по големина производител на автомобили во светот ќе ги намали инвестициите за околу 15%, на нешто над 130 милијарди евра, во следните пет години.