Седум француски семејства покренаа тужба против ТикТок, обвинувајќи ја платформата дека ги изложила нивните малолетни деца на штетни содржини, при што две од нив извршиле самоубиство на 15-годишна возраст.

Во тужбата се вели дека алгоритамот на ТикТок ги изложил седумтемина тинејџери на видеа кои промовираат самоубиство, самоповредување и нарушувања на исхраната, кажа адвокатката Лора Бутрон-Мармион. Таа кажа дека ова е прв ваков групен случај во Европа.

„Родителите сакаат правната одговорност на ТикТок да биде призната на суд. Ова е комерцијална компанија која нуди производ на корисници, кои, згора на тоа, се малолетни. Затоа таа мора да одговара за недостатоците на својот производ“, изјави Бутрон-Мармион.

ТикТок ги отфрла обвинувањата дека го оштетува менталното здравје на децата и тврди дека инвестирала во мерки за заштита на младите корисници на апликацијата.