Две години по најтешката железничка несреќа во историјата на Грција, во која загинаа 57 луѓе, земјата денеска е парализирана од генерален штрајк и стотици протести, со кои се потсетува на трагедијата која стана симбол на институционален неуспех.

Масовната мобилизација, предводена од роднините на загинатите, е поттикната од незадоволството на јавноста од неактивноста на конзервативната влада. Критичарите велат дека политичарите треба да одговараат за причините што довеле до несреќата, но досега само службеници на железницата се обвинети во овој случај.

Несреќата се случи на 28 февруари 2023 во Темпе во северна Грција, кога патнички воз директно се судри со товарен воз. Притоа беа повредени десетици луѓе и се открија недостатоци во националната железничка инфраструктура.

„Целосната вистина мора да излезе на виделина, а оние кои се одговорни, без разлика на која позиција се наоѓаат, мора да бидат гонети. Да ги заземеме улиците и да ги изразиме гневот и барањата на мнозинството на грчкиот народ“, изјави Јанис Панајопулос, претседателот на најголемиот работнички синдикат во земјата.

Низ Грција се запрени возови, авиони и траекти, а јавниот превоз е сериозно нарушен. Кон штрајкот се приклучија и бројни приватни бизниси и јавни услуги, а многу продавници во Атина се затворени. Илјадници луѓе се собраа пред парламентот во Атина, а протести се планирани во повеќе од 300 градови во Грција и во странство. На улиците на Атина се распоредени повеќе од 5.000 полицајци.