Гренланд му припаѓа на неговиот народ и само Данска и Гренланд можат да одлучуваат за прашања што се однесуваат на нивните односи, соопштија денеска лидерите на Германија, Франција, Италија, Полска, Шпанија, Велика Британија и Данска во заедничка изјава.

„Кралството Данска, вклучувајќи го и Гренланд, е дел од НАТО“, предупредуваат европските лидери со оглед на територијалните претензии на американскиот претседател Доналд Трамп. Затоа, како што се вели, безбедноста на Арктикот мора да се гарантира заеднички со сојузниците на НАТО, вклучувајќи ги и САД, преку почитување на принципите на Повелбата на ОН: суверенитет, територијален интегритет и неповредливост на границите.

„Ова се универзални принципи. И ние нема да престанеме да ги браниме“, нагласуваат европските држави потсетуваат на одбранбениот договор од 1951 година меѓу Данска и САД.

Соопштението експлицитно се осврнува на безбедносните грижи на САД.

„Безбедноста на Арктикот останува клучен приоритет за Европа и е од клучно значење за меѓународната и трансатлантската безбедност“.

НАТО, исто така, јасно стави до знаење дека арктичкиот регион е приоритет. Европските сојузници ги интензивираат своите напори. Тие го зголемија своето присуство, активности и инвестиции за да обезбедат безбедност на Арктикот и да ги одвратат противниците.

Во последните денови, Трамп ги потврди претензиите на САД за арктичкиот остров. На САД им е потребен Гренланд за национална безбедност, рече тој.

Гренланд му припаѓа на Кралството Данска, но е во голема мера автономен. Заменик-шефот на кабинетот на Трамп, Стивен Милер, неодамна го опиша барањето на САД за контрола на Гренланд како „официјален став на американската влада“.