Германија објави дека ќе ѝ даде воена помош на Украина вредна 2,7 милијарди евра, нејзин најголем ваков пакет од почетокот на руската инвазија и додаде дека ќе го поддржува Киев колку што биде потребно.

Пакетот, меѓу другото, вклучува 30 тенкови „леопард“, 15 противвоздушни тенкови „гепард“, над 200 извиднички дронови и четири противвоздушни системи „ирис-Т“, објави германското министерство за одбрана.

„Посакуваме брз крај на оваа ужасна и незаконска војна. За жал, крајот не е на повидок. Затоа Германија ќе обезбеди секоја можна помош за Украина, колку што биде потребно“, изјави министерот за одбрана Борис Писториус.

И од кабинетот на Зеленски ја потврдија пратката, за која кажаа дека содржи и 100 оклопни возила и големи количества муниција.

Ова следува два дена откако Велика Британија стана првата земја која ѝ испрати проектили со долг дострел на Украина, која вели дека сè уште не почнала со противофанзивата, иако во изминатите денови бележи напредок на фронтот кај Бахмут.