Хутските борци ја продолжија офанзивата во обид да заземат стратешки височини во Јемен за да го отсечат крајбрежјето на Црвеното Море од преостанатите области под контрола на силите поддржани од Саудиска Арабија. Ова следува откако беше објавено дека Доналд Трамп во последен момент ги откажал американските напади врз оваа група.

„Њујорк тајмс“ објави дека администрацијата на Трамп се подготвувала во неделата да изврши воздушни напади врз хутите, по нови барања од саудискиот престолонаследник. Сепак, весникот наведе дека Трамп ги откажал нападите во последен момент, кога војниците веќе товареле бомби во авиони.

Хутите, кои го контролираат главниот град на Јемен од 2014 година, овој месец ја зазедоа крајбрежната област на земјата долж Црвеното Море, во офанзива во која ги потиснаа владините сили. Според наводите на хутите, Саудиска Арабија во изминатите денови извршила стотици напади врз позициите на борците во планинските предели.

Пет воени извори од Јемен изјавија за „Ројтерс“ дека хутите сега се обидуваат да ги заземат стратешките височини познати како планините Кабуб, кои го одвојуваат брегот на Црвеното Море од југот, што е под контрола на владата.

Ескалацијата на борбите помеѓу Саудиска Арабија и хутите му создава дилема на Трамп, кој е под притисок да им помогне на саудиските сојузници, но истовремено сака да избегне дополнително ширење на крајно непопуларната војна, што ја започна против Иран во февруари. САД ги бомбардираа хутите во почетокот на 2025, но Трамп ги прекина нападите откако беше постигнат прекин на огнот и оттогаш се држи настрана од конфликтот во Јемен.