Американскиот претседател Доналд Трамп разговара за „низа опции“ за заземање на Гренланд, меѓу кои и употреба на војската, соопшти Белата куќа. Белата куќа изјави за „Би-Би-Си“ дека заземањето на Гренланд – полуавтономен регион на Данска, која е членка на НАТО, е „приоритет на националната безбедност“.
Изјавата следеше по неколку часа откако европските лидери издадоа заедничка изјава во која ја поддржуваат Данска, која се спротивставува на амбициите на Трамп за арктичкиот остров.
Трамп повтори во текот на викендот дека на САД им е „потребен“ Гренланд од безбедносни причини, што ја поттикна данската премиерка Мете Фредериксен да предупреди дека секој напад од САД би значел крај на НАТО.
Белата куќа вчера соопшти: „Претседателот и неговиот тим разговараат за низа опции за остварување на оваа важна цел на надворешната политика и, секако, користењето на американската војска е секогаш опција на располагање на Врховниот командант“.
НАТО е трансатлантска воена група каде што се очекува сојузниците да си помогнат едни на други во случај на надворешни напади. Вчера, шест европски сојузници изразија поддршка за Данска.
„Гренланд му припаѓа на својот народ и само Данска и Гренланд можат да одлучуваат за прашања што се однесуваат на нивните односи“, изјавија лидерите на Велика Британија, Франција, Германија, Италија, Полска, Шпанија и Данска во заедничка изјава.
Нагласувајќи дека се исто толку заинтересирани како и САД за безбедноста на Арктикот, европските потписници на заедничката изјава рекоа дека ова мора да го постигнат „колективно“ сојузниците на НАТО, вклучувајќи ги и САД. Тие, исто така, повикаа на „почитување на принципите на Повелбата на ОН, вклучувајќи го суверенитетот, територијалниот интегритет и неповредливоста на границите“.
Стивен Милер, заменик-шефот на кабинетот на Белата куќа, завчера изјави дека Гренланд треба да биде дел од САД и покрај предупредувањето од Фредериксен дека преземањето од страна на САД би значело крај на НАТО.
„Претседателот веќе со месеци е јасен дека САД треба да бидат нацијата што го има Гренланд како дел од нашиот целокупен безбедносен апарат“, рече Милер во интервјуто за Си-Ен-Ен.
