Илјадници жители вчера упаднаа во магацини и дистрибутивни центри на југот и средината на Појасот Газа, земајќи брашно и други основни намирници, соопшти денеска агенцијата на ОН за помош на палестинските бегалци (УНРВА).

„Ова е загрижувачки знак дека граѓанскиот поредок почнува да се урива по три недели војна и цврста опсада на Газа“, се вели во соопштението на УНРВА. „Луѓето се исплашени, фрустрирани и очајни. Тензиите и стравот се влошуваат поради прекините на телефоните и линиите за интернет комуникација“.

Шефот за хуманитарни прашања на ОН, Мартин Грифитс, во четвртокот рече дека помошта „едвај стигнувала“ во Газа во изминатата недела, додека израелските бомбардирања се интензивираат.

Во меѓувреме, телефонските линии и интернет-врските полека се враќаат по повеќе од еден ден речиси целосно прекин на комуникацијата. Прекинот беше бидејќи Израел го интензивираше бомбардирањето на Газа и започна голема копнена операција во која се вклучени тенкови и војници. Израелските одбранбени сили (ИДФ) соопштија дека воени авиони нападнале „над 450 воени цели на терористичката организација Хамас во Појасот Газа“ во текот на последниов ден.

Израел ја бомбардира Газа од нападите на Хамас на 7 октомври во кои загинаа 1.400 луѓе, а 229 луѓе беа киднапирани како заложници. Министерството за здравство кое го раководи Хамас во Газа соопшти дека повеќе од 8.000 луѓе се убиени од почетокот на израелските одмазднички бомбардирања.