Иран лансираше напади со ракети и беспилотни летала врз американски цели во Јордан, Кувајт, Ирак и Бахреин откако американските сили ги продолжија нападите врз земјата.

Иранската Црвена полумесечина објави дека пет лица, вклучувајќи дете, се убиени, а повеќе од 50 се повредени, кога во американски ракетен напад во јужен Иран бил погоден дом каде што се одржувала свадбена прослава. Американската војска соопшти дека е свесна за извештаите, но дека никогаш не таргетирала цивили.

Централната команда на САД соопшти дека американските напади врз Иран следеле по неодамнешните обиди за напади на Исламската револуционерна гарда врз комерцијален брод во Ормускиот Теснец и американските сили во регионот. Гардата соопшти дека САД ќе жалат за нападите и лансираше балистички ракети врз американската поморска база во Акаба во Јордан. Јорданските вооружени сили соопштија дека пресретнале 13 балистички ракети.

По вчерашните први напади од крајот на јули, Доналд Трамп предупреди дека „Иран ќе биде погоден на многу потешко и повисоко ниво доколку возврати“.

Иранските државни медиуми и иранската Црвена полумесечина објавија дека во последниот бран напади биле бомбардирани и цивилни објекти на јужниот брег на Иран, при што била погодена свадбена церемонија во округот Сирик, кој се наоѓа на Ормускиот Теснец.

„Американската војска никогаш не ги гаѓа цивилите, за разлика од Исламската револуционерна гарда“, изјави капетанот на американската армија Тим Хокинс.