Џо Бајден и Бенјамин Нетанјаху разговараа за првпат по неколку недели, додека неизбежно се очекува израелски напад врз Иран, за кој министерот за одбрана Јоав Галант кажа дека ќе биде смртоносен, прецизен и изненадувачки. Галант изјави дека иранскиот ракетен напад врз Израел на 1 октомври бил неуспешен, но нема да помине без одмазда.
„Секој што ќе нѐ нападне ќе биде повреден и ќе плати цена. Нашиот напад ќе биде смртоносен, прецизен и, пред сѐ, изненадувачки. Тие нема да сфатат што се случило и како се случило, ќе ги видат резултатите“, рече Галант во видеопорака до израелските медиуми.
Таа беше емитувана неколку часа откако израелскиот премиер Нетанјаху половина час разговараше со Бајден, на кого му се придружи и Камала Харис. Белата куќа кажа дека Бајден „недвосмислено“ го осудил иранскиот напад и ја нагласил железната американска поддршка за Израел.
„Тие имаа директен и продуктивен разговор и се согласија дека ќе останат во близок контакт во следните денови“, објави Белата куќа.
Времето и обемот на израелската одмазда и натаму не се познати и погрешна проценка би можела да резултира со општа војна помеѓу Израел и Иран, што ниедна страна не го сака.
Повеќе од 2.100 луѓе загинаа од почетокот на израелските напади врз Либан, но вчера за првпат загинаа и израелски цивили, откако Хезболах испукал 150 ракети кон северен Израел. Властите кажаа дека маж и жена во 40-ти години настрадале од шрапнели во пограничниот град Кирјат Шмона.
