Израел објави охрабрувачки резултати откако вакцинираше повеќе од една третина од своето население против ковид-19.

Здравствените власти кажаа дека од 163.000 луѓе кои ги примиле двете дози од вакцината на „Фајзер/Бионтек“, само 31 се заразил со коронавирус. Во другата контролирана група со невакцинирани луѓе имало 6.450 заразени.

Од вакцинираните кои се заразиле никој не бил хоспитализиран и некои имале само благи симптоми, како главоболка. Властите кажаа дека тоа сугерира дека вакцината дава заштита од 92%, што е блиску до тврдењата на „Фајзер“ дека е 95-процентно ефективна.

Израел е светски лидер во имунизацијата против ковид-19 и вакцина дневно примаат речиси 200.000 луѓе. Оваа недела, таа ќе биде достапна за сите кои имаат над 35 години.

„Ова се многу, многу добри вести. Ова е прво истражување на светот кое зема предвид вака голема бројка на вакцинирани луѓе“, изјави Амат Ека Зохар, потпретседателот на здравствените служби Макаби.