Една од последните функционални болници во северниот дел на Газа е присилно евакуирана од израелската војска, велат медицинските лица, откако, наводно, десетици луѓе биле убиени во израелските воздушни напади насочени кон областа околу здравствената установа. Еид Сабах, шеф на Oдделот за медицински сестри во болницата Камал Адван, изјави дека денеска околу 7 часот, војската ѝ дала на администрацијата 15 минути да ги евакуира пациентите и персоналот во нејзиниот двор. Израелските војници последователно влегоа во болницата и сега ги отстрануваат останатите пациенти, рече д-р Сабах.

Израелската војска соопшти дека „не знаела“ за нападите во областа и дека ги разгледува извештаите за убиените медицински лица.

„Опасно е затоа што има пациенти на Одделот за интензивна нега во кома и имаат потреба од апарати за вентилација и нивното преместување ќе ги доведе во опасност“, рече д-р Сабах. „Доколку армијата има намера да продолжи да ги отстранува овие пациенти, ќе им требаат специјализирани возила“.

Во моментов нема информации за повредени при евакуацијата.

Израелските одбранбени сили (ИДФ) сè уште не коментираа за евакуацијата, но претходно во текот на неделата, израелски официјален претставник изјави дека тие имаат намера да ги преместат оние од болницата Камал Адван во блиската индонезиска болница која самата беше евакуирана од израелската војска во вторникот. Ова е откако директорот на болницата Камал Адван изјави дека околу 50 луѓе биле убиени, меѓу кои и петмина медицински персонал, во серија израелски воздушни напади насочени кон околината на болницата.

Во изјавата на д-р Хусам Абу Сафија се вели дека зградата спроти болницата била цел на израелски воени авиони, што довело до смрт на педијатар и лабораториски техничар, како и нивните семејства. Тој рече дека третиот член на персоналот кој работел како техничар за одржување бил убиен додека брзал на местото на првиот напад.