Јеменските хути, кои се поддржани од Иран, објавија дека воведуваат поморска блокада на Саудиска Арабија, потег што отвора нов фронт против САД во нивната војна против Иран и ја проширува заканата за глобалните резерви на енергенси и за трговијата надвор од Заливот.

Објавата уследи и покрај назнаките дека Техеран и Вашингтон сакаат да продолжат со дипломатијата за да го запрат тековниот циклус на напади, што речиси го уништија кревкиот привремен договор потпишан минатиот месец.

„Прогласуваме поморско ембарго против криминалниот саудиски непријател како одговор на неправедната и угнетувачка опсада на Јемен од страна на Саудијците. Блокадата стапува во сила веднаш“, соопштија хутите.

Иран вршеше притисок врз хутите да го затворат теснецот Баб ел-Мандеб кон Црвеното Море доколку САД продолжат да ја напаѓаат иранската инфраструктура. Целосното затворање на теснецот би го намалило глобалното снабдување со нафта за 7%, бидејќи поголемиот дел од саудиската нафта не би можел да го напушти регионот.

Висок ирански функционер денеска изјави дека Техеран добил предлог од посредниците за десетдневен прекин на огнот, во обид да се спаси привремениот договор со САД.

Американскиот државен секретар Марко Рубио вети дека САД ќе продолжат да го напаѓаат Иран сè додека тој го напаѓа глобалниот комерцијален превоз во Ормускиот Теснец.

„Сè додека Иран инсистира на контрола на теснецот, ние ќе мора да одговориме на тоа. Но, САД секогаш остануваат отворени за дипломатско решение“, рече Рубио.