Канадскиот премиер Марк Карни му се извини на претседателот на САД, Доналд Трамп, поради политичка реклама против царините, која била нарачана од премиерот на Онтарио, Даг Форд. И покрај извинувањето, САД соопштија дека трговските преговори меѓу двете земји остануваат во прекин.

Говорејќи пред новинарите во саботата по завршувањето на азиско-пацифичкиот самит во Јужна Кореја, Карни потврди дека приватно му се извинил на Трамп за време на вечера во средата.

„Му се извинив на претседателот“, изјави Карни, потврдувајќи ги коментарите што Трамп ги даде во петокот.

Канадскиот премиер додаде дека ја видел рекламата пред да биде емитувана и му рекол на Форд дека се противи на нејзиното објавување.

„Му кажав на Форд дека не сакам да продолжиме со таа реклама“, рече тој.

Рекламата, нарачана од Форд, истакнат конзервативен политичар кој понекогаш е споредуван со Трамп, користи исечок од говор на поранешниот републикански претседател Роналд Реган во кој тој вели дека царините предизвикуваат трговски војни и економска катастрофа.

Како одговор на рекламата, Трамп најави дека ги зголемува царините за стоки од Канада, а Вашингтон ги прекина трговските преговори со Отава.

При заминувањето од Јужна Кореја, Трамп изјави дека имал „многу убав“ разговор со Карни, но во петокот сепак потврди дека Соединетите Американски Држави и Канада нема да ги продолжат трговските преговори.