Канадскиот премиер Џастин Трудо би можел да поднесе оставка во следните денови, објавија тамошните медиуми. Тој размислувал да се повлече од лидерската позиција во владејачката Либерална партија, што ќе стави крај и на неговите девет години како премиер.

Канадската влада е во криза и минатиот месед оставка поднесе министерот за финансии, а популарноста на Трудо опадна кај гласачите. Анкетите предвидуваат пораз на Либералите на парламентарните избори оваа година.

Медиумите објавија дека Трудо планира да се повлече пред состанокот на водството на партијата в среда, со цел да избегне да биде сменет од сопствените пратеници. Нејасно е дали Трудо ќе остане премиер додека не се избере нов лидер на партијата.

Изборите во Канада треба да се одржат пред октомври, но оставката на Трудо би можела да доведе до предвремени избори во следните месеци. На една анкета во септември само 26% Канаѓани се изјасниле дека Трудо и натаму е погоден да биде премиер, додека многумина го фаворизираат лидерот на Конзервативците, Пјер Полиев.