Капсулата на Илон Маск со двајца американски астронаути во посадата успешно се спои со Меѓународната вселенска станица (ИСС) по 19-часовен лет.

Ракетата со новата капсула „дрегон“ синоќа беше лансирана од вселенскиот центар „Кенеди“ во Флорида, со што „Спејс-Екс“ стана прва приватна компанија во историјата која испратила луѓе во вселената.

На историскиот лет беа едни од најискусните астронаути на НАСА, Даг Харли и Боб Бенкен, кои во наредните недели ќе бидат дел од американско-рускиот екипаж на ИСС. Спојувањето со Станицата беше целосно автоматизиран процес, во кој Харли и Бенкен немаше потреба да бидат вклучени.

Ова е почетокот на комерцијалните летови во вселената и НАСА на следните шест мисии исто така ќе ги користи „такси“ услугите на „Спејс-Екс“. Наредната е планирана за втората половина на август, кога ќе патуваат четворица астронаути.