Курдски милитанти нападнаа полициска станица во југоисточна Турција со камион полн со експлозиви, убивајќи најмалку 11 полицајци, а има и 78 повредени, јави турската државна агенција „Анадолу“. Нападот се случи утринава во градот Џизре во провинцијата Сирнак на границата со Сирија, која е населена претежно со Курди.
Никој не презеде одговорност за нападот, кој е последен од серијата бомбашки напади на полициски или воени возила и инсталации. Властите ја обвинија Курдската работничка партија (ПКК) за нападот. Телевизиските снимки покажаа како се крева црн чад од уништениот камион, а од полициската станица на три ката останаа само ѕидовите.
Министерството за здравство соопшти дека испратило 12 возила на брза помош и два хеликоптери на местото на настанот.
Насилството помеѓу ПКК и турските безбедносни сили продолжи минатата година по пропаѓањето на кревкиот двегодишен мировен процес. Оттогаш, стотици припадници на безбедносните сили загинаа во бомбашки напади и вооружени пресметки со курдските милитанти.