Шефот за вештачка интелигенција во „Мајкрософт“, Мустафа Сулејман, предупреди дека без соодветни заштитни мерки, развојот на вештачката интелигенција може да доведе до појава на „силиконски вид“ кој ќе се натпреварува со луѓето.

Сулејман ја обвини конкурентската фирма „Антропик“ дека се однесува кон вештачката интелигенција како да е човек, додавајќи дека ваквиот пристап е погрешен и би можел да создаде технологија што човештвото не може да ја контролира.

„Луѓето со право се загрижени за вештачката интелигенција, но постојат многу практични работи што можеме да ги направиме за да ја контролираме“, кажа Сулејман.

Сулејман предупреди против фирмите кои продолжуваат да создаваат системи со вештачка интелигенција способни да поставуваат свои цели, да заработуваат пари и да поседуваат средства.

„Тоа во суштина би значело создавање нов силиконски вид, кој несомнено би можел да се натпреварува со нас за ресурси“, вели Сулејман.

Во претходно објавен есеј, тој го критикуваше „Антропик“ за тоа што ја научил својата вештачка интелигенција „Клод“ да има човечки квалитети, практика позната како антропоморфизација.

„Вештачките интелигенции не се свесни. Тие не чувствуваат, не искусуваат и не страдаат. Тие немаат вродени преференци или основни мотивации. Тие се мотори за завршување на секвенцата, дизајнирани да следат инструкции и да остваруваат цели поставени од луѓето“, кажа Сулејман.

„Мајкрософт“ го основа својот тим за суперинтелигенција во октомври 2025, а компанијата, слично како и нејзиниот конкурент „Антропик“, се залага за развој на напредна вештачка интелигенција.