Повеќе од еден милион домаќинства во Украина се без електрична енергија откако Русија изврши серија ноќни напади врз енергетската и индустриската инфраструктура, соопштија украинските власти.

Министерот за внатрешни работи Игор Клименко изјави дека биле погодени пет региони, при што се повредени најмалку пет лица. Службите работат на гаснење на пожарите и обновување на снабдувањето. Според Клименко, погодени се регионите Дњипропетровск, Кировоград, Миколаив, Одеса и Чернихив.

Украинскиот претседател Володимир Зеленски изјави дека во нападите биле користени повеќе од 450 дронови и 30 проектили. Руското Министерство за одбрана потврди дека користеле и хиперсонични ракети „Кинжал“, кои се тешки за следење бидејќи можат да го променат правецот среде лет.

Москва ги интензивираше нападите додека земјата се подготвува за зима, иако ударите врз енергетската мрежа се честа појава во текот на целата војна.

Меѓународната агенција за атомска енергија (МААЕ) соопшти дека нуклеарната централа Запорожје привремено го загубила целото надворешно напојување во текот на ноќта поради „воени активности кои ја погодиле електричната мрежа“, но сега е повторно поврзана. Централата, која е под руска контрола, не произведува струја, но зависи од постојано напојување за ладење на реакторите.

Нападите се случуваат во пресрет на посетата на специјалниот пратеник на новоизбраниот американски претседател Доналд Трамп, Стив Виткоф, кој викендов ќе отпатува за Германија. Тој треба да се сретне со Зеленски и со европските лидери во Берлин за да разговараат за најновата верзија на предложениот мировен договор, како дел од обидите на Белата куќа да посредува меѓу Украина и Русија.