Сѐ е спремно за лансирањето на првата мисија со човечки екипаж кон Месечината од 1972 година. Се најавува дека временските услови ќе бидат наклонети и ако нема непредвидени проблеми, мисијата „Артемис 2“ ќе полета од вселенскиот центар „Кенеди“ во Флорида ноќва половина час по полноќ по средноевропско време.
Четиричлениот екипаж на НАСА нема да слета на Месечината за време на десетдневниот пробен лет, туку ќе лета околу неа и можеби ќе забележи пејзажи што досега не се видени со човечки очи. Во ракетата ќе бидат еден канадски и тројца американски астронаути, кои ќе отидат подлабоко во вселената од она што луѓето отишле досега.
Мисијата, која треба да постави основа за идни, редовни летови на Месечината, чинеше најмалку 93 милијарди долари од 2012 година. Ниеден човек не стапнал на Месечината од мисијата „Аполо 17“ во 1972 година и тоа конечно треба да се повтори во 2028, како што засега се планира.
Откако во минатото се натпреваруваа со Советскиот Сојуз, САД во изминатите години се фокусирани на конкуренцијата од Кина, која брзо ја развива својата вселенска програма и планира да испрати луѓе на Месечината во 2030 година.
„Месечината е сведок на формирањето на Сончевиот систем и отскочна штица до Марс, каде што можеби имаме најголема веројатност да најдеме докази за минат живот. Многу земји ја препознаа вредноста на понатамошното истражување на Сончевиот систем, на Месечината и понатаму на Марс. Тие сфаќаат дека туку имаме и можност да одговориме на прашањето што би можело да биде прашањето на нашиот живот, а тоа е ‘Дали сме сами?‘. Одговорот на тоа прашање започнува од Месечината. Прашањето не е дали треба да одиме, туку дали треба да водиме или треба да следиме?“, кажа Кристина Кох, американска астронаутка која ќе биде дел од екипажот.
Се очекува 400.000 луѓе да се соберат на самото место за да присуствуваат на лансирањето.
Мисијата „Артемис 2“ ќе претставува и голем тест за капсулата „Орион“ на НАСА, која спроведе слична мисија без екипаж во 2022. Астронаутите во ракетата ќе тестираат критични системи за одржување на живот, интерфејси на екипажот, навигација и комуникации.
