Русија вели дека не може да ги прифати американските предлози за крај на војната во Украина во сегашната форма зашто тие не ги решаваат проблемите за кои Москва смета дека го предизвикале конфликтот. Навестувајќи дека преговорите за примирје се во застој, заменик-министерот за надворешни работи Сергеј Рјабков смета дека Русија и САД досега не успеале да ги премостат разликите што Владимир Путин ги истакна пред повеќе од две недели, кога кажа дека американските предлози треба да бидат преработени.

Доналд Трамп викендов кажа дека му е лут на Путин и се закани дека ќе им воведе санкции на државите кои ја купуваат руската нафта ако Москва го блокира договорот за примирје. Рјабков, кој е експерт за руско-американските односи, вели дека Русија засега не може да го спроведе договорот.

„Многу сериозно ги сфаќаме моделите и решенијата предложени од САД, но не можеме да ги прифатиме во сегашната форма. Моментално, во нив нема место за нашите барања, како решавањето на проблемите кои се корен на овој конфликт. Тие се целосно отсутни и тоа мора да се надмине“, кажа Рјабков.

Путин претходно кажа дека Русија ќе прифати целосно примирје ако Украина се откаже од амбициите за членство во НАТО и ја ограничи големината на својата војска и ако Русија ги контролира четирите украински региони кои незаконски ги анектираше во 2022. Киев смета дека овие барања се рамни на капитулација.

Портпаролот на Кремљ, Дмитри Песков, кажа дека Москва продолжува да контактира со американската страна.

„Темата е многу сложена. Супстанцијата за која разговараме е многу сложена. Тоа бара многу напори“, рече Песков.