И покрај различните позиции за поддршката за Украина, францускиот министер за надворешни работи  Стефан Сежурне рече дека не гледа раздор меѓу Франција и Германија, во интервјуто пред разговорите со неговата германска колешка.

„Нема француско-германски конфликт, ние се согласуваме за 80 отсто од прашањата“, рече вчера Сежурне во интервју за весникот „Монд“. „Постои волја да разговараме еден со друг“, рече тој, додавајќи дека разговарал со неговата германска колешка Аналена Баербок, со која треба да се сретне во Париз во вторник.

И Франција и Германија се клучни поддржувачи на Украина во нејзиниот обид да се одбрани од целосната руска инвазија започната во 2022. Киев во голема мера се потпира на западните сојузници во својата борба и постојано повикува на повеќе и потешко оружје за одбивање на руските сили. Сепак, германскиот канцелар Олаф Шолц и понатаму категорично ја отфрла испораката на крстосувачките ракети „таурус“, додека Франција веќе му ги стави на располагање на Киев ракетите СКАЛП, кои се слични, и вели дека ќе следат уште.

Одејќи чекор понатаму, францускиот претседател Емануел Макрон им рече на бројните лидери на самитот во Париз дека нема да го исклучи распоредувањето на западните копнени трупи во Украина. Многу други лидери, вклучително и на Германија, се оградија од идејата и Шолц рече дека од германска перспектива, нема да има распоредување на копнени трупи.

„Ќе бидам искрен: сè што отфрливме во еден момент во времето, го направивме шест месеци подоцна поради ситуацијата“, рече Сежурне. Тој истакна дека Германија и Франција ја поддржуваат Украина во различни степени, на пример за прашањето за ракетите. „Ова не е драма, бидејќи ние имаме иста цел да ја поддржиме Украина“.

Она што е потребно, сепак, е поголема кохерентност во европскиот пристап, рече францускиот дипломат.

„Кога ќе го слушнете германскиот министер за одбрана Борис Писториус како вели две недели пред состанокот дека веројатно ќе бидеме во војна со Русија во следните пет години, тогаш мислиме дека треба да извлечеме последици“, додаде тој, велејќи дека Европа треба да разговара за прашањето.

Макрон не ги изненади учесниците на конференцијата за помош на Украина во Париз, рече Сежурне.

„Тие многу добро знаеја што е на дневен ред и дека не се работи за испраќање борбени копнени трупи. Се работеше за промена на рамнотежата на силите со Москва“, рече тој. „Неопходно е да ја имаме оваа дебата меѓу нас, дури и ако сè уште нема консензус. Во суштина, сите имаа иста анализа на ситуацијата и исти цели да се осигура дека Русија нема да успее во војната против Украина“, рече тој.

Шолц, во меѓувреме, предизвика гнев и збунетост со коментарот кој сугерираше дека Британија и Франција имаат војници во Украина за програмирање на крстосувачките ракети што ги испорачале, што Германија не можеше да го направи. Лондон веднаш негираше дека тоа е случај. Сежурне, исто така, негираше дека француски војници се во Украина. „Во моментов нема воено присуство, само поддршка во форма на материјал и оружје“, рече тој.