Израелскиот премиер Бенјамин Нетанјаху го распуштил шестчлениот воен кабинет, изјави еден израелски функционер, што се очекуваше откако од владата излезе пензионираниот генерал Бени Ганц. Се очекува Нетанјаху сега да одржи консултации за војната во Газа со мала група министри, вклучувајќи го министерот за одбрана Јоав Галант.

Нетанјаху се соочува со барања од националистичко-религиозните партнери во неговата коалиција да бидат вклучени во воениот кабинет, што би можело да ги засили тензиите со меѓународните партнери, како САД.

Овој кабинет беше создаден откако Ганц му се придружи на Нетанјаху во владата на национално единство на почетокот на војната во октомври.

Распуштањето на кабинетот доаѓа по протестите против владата на Нетанјаху и начинот на кој се води војната против Хамас.