Границите на Нов Зеланд се целосно отворени за првпат од март 2020, кога беа затворени за да се спречи ширењето на коронавирусот. Од денеска, во земјата повторно можат да влегуваат туристи и студенти со визи, од кои се бара да бидат целосно вакцинирани, но веќе не мора да одат во карантин.

Повторно се отворени и поморските граници на земјата и дозволено е пристанувањето на странски крузери и јахти.

„Ова е огромен момент, кој е дел од еден внимателен процес“, изјави премиерката Џасинда Ардерн.

Нов Зеланд постепено почна да ги отвора границите во февруари, кога прво им беше дозволен влез на вакцинираните Австралијци. Во мај почна да прима туристи од повеќе од 50 држави.