Француските обвинители побараа максимално дозволена 20-годишна затворска казна за Доминик Пелико за дрогирање и силување на неговата сопруга Жизел, при што поканил повеќе од 70 странци да ја силуваат и злоставуваат за период од десетина години.

„Казната побарана за Пелико е долга, но и недоволно долга, имајќи ја предвид тежината на фактите кои беа извршени и повторувани. Неговата потрага по задоволство се рефлектираше во желбата да ја потчини и понижи својата сопруга, па дури и да ја деградира преку своите постапки и зборови“, изјави помошничката на јавниот обвинител Лор Шабод во судот во Авињон, каде што им се судеше на Пелико и на 50 други мажи од септември.

Пелико ги призна обвиненијата, а најголем дел од останатите обвинети, кои се на возраст од 25 до 74 години, го признаа злоставувањето на Жизел Пелико, но не и силување, тврдејќи дека мислеле оти учествуваат во фантазиите на двојката. Шабод кажа дека никој од нив немал директен контакт со Жизел Пелико пред злоставувањата и никој не барал согласност од неа.

Жизел Пелико стана меѓународна феминистичка икона зашто не сакаше да го крие својот идентитет и одби судењето да се одвива зад затворени врати. Се согласи да бидат прикажани и видеоснимки од злоставувањата, што Доминик ги снимал додека таа била онесвестена. Таа кажа во судот дека верува дека била силувана до 200 пати меѓу 2011 до 2020.

Францускиот премиер Мишел Барние изјави дека судењето ја шокираше нацијата, а министерката за еднаквост Салима Са денеска претстави нови мерки за борба против насилството врз жените и сексуалното злоставување.

Пресудите треба да бидат објавени на 20 декември.