Рускиот претседател Владимир Путин го нарече својувањето на градот Авдиивка „важна победа“ откако началникот на украинската војска вчера рече дека неговите војници се повлекле од разурнатиот град на истокот на земјата во Донецкиот Регион по неколкумесечна интензивна борба. Иако руското Министерство за одбрана соопшти дека украинските единици сè уште се забарикадирани во фабриката за кокс во градот, напредокот кон Авдиивка е најголемиот успех на Москва откако лани во мај го зазеде Бахмут.

Тоа се случи неколку дена пред втората годишнина од целосната инвазија на Русија врз Украина и во услови на акутен недостиг на муниција во Украина, a новата американска воена помош со месеци се одложува во Конгресот. Ова е и најјасен знак досега за тоа како бранот на војната се сврте во корист на Москва, откако украинската контраофанзива лани не успеа да ги пробие руските линии.

„Шефот на државата им честиташе на руските војници за овој успех, важна победа“, се вели во соопштението на Кремљ објавено на официјалната веб-страница.

Американскиот претседател Џо Бајден оваа недела предупреди дека Авдиивка може да падне во рацете на руските сили поради недостиг на муниција, поради неколкумесечното противење на републиканците во Конгресот за новиот пакет за воена помош на САД за Киев. Во соопштението на Белата куќа се вели дека Бајден вчера разговарал со украинскиот претседател Володимир Зеленски за да ја нагласи посветеноста на САД да продолжи да ја поддржува Украина и ја повторил потребата Конгресот итно да го усвои пакетот за помош на украинските сили.