Пазарната вредност на сопственикот на Фејсбук, „Мета“, паднала за повеќе од 230 милијарди долари вчера, што е рекордна дневна загуба за компанијата досега. Нејзините акции паднаа за 26,4% откако резултатите од последното тримесечје на 2021 ги разочараа инвеститорите.

„Мета“ претходно соопшти дека бројот на дневни активни корисници на Фејсбук се намалил за првпат во неговата 18-годишна историја.

Поради падот на акциите на „Мета“, богатството на нејзиниот извршен шеф Марк Закерберг наеднаш се намалило за 31 милијарда долари, што е рамно на годишниот бруто домашен производ на Естонија.

„Мета“ предупреди дека ќе се намали и растот на приходите додека се соочува со силна конкуренција од ТикТок и Јутјуб, а и огласувачите го кратат трошењето. Компанијата предвидува дека во првото тримесечје од годината ќе има приходи меѓу 27 и 29 милијарди долари, што е помалку од она што го очекуваа аналитичарите.