Животот на Џани Алемано, поранешниот градоначалник на Рим, драстично се промени на новогодишната ноќ, кога беше уапсен и спроведен во затворот „Ребибија“ во Рим. Оттогаш, Алемано започна нова политичка битка – осуда на лошите услови во пренатрупаните италијански затвори. Ова е неочекувана кампања за политичар од крајната десница, која традиционално се залага за построги казни, но неговото политичко минато ѝ дава тежина на неговата мисија.
Алемано, кој во младоста беше член на неофашистичкото Италијанско социјално движење, а подоцна министер за земјоделство во владата на Силвио Берлускони и градоначалник на Рим од 2008 до 2013 година, сега води „затворски дневник“ што го објавува на социјалните мрежи и испраќа отворени писма до премиерката Џорџа Мелони.
Во своите писма, тој ги опишува секојдневните трагедии во затворскиот живот, споделувајќи приказни за други затвореници и известувајќи за обиди за самоубиство.
„Никогаш не бил во затвор и кога влезе, беше запрепастен“, вели неговиот адвокат Едоардо Албертарио за „Политико“.
Една од неговите најчитани објави ја опишува ситуацијата во „Ребибија“, најголемиот затвор во Италија, каде што ќелиите лете се претвораат во „печки“ поради лошата изолација.
„Но, политиката спие (со клима-уред), чекајќи надлежниот комесар магично да изгради нови затвори“, напиша Алемано, критикувајќи го ветувањето на владата дека ќе го реши проблемот со изградба на нови затвори и пристапот „закон и ред“.
Според извештајот на невладината организација „Антигона“, заклучно со април, во италијанските затвори имало над 62.000 луѓе во капацитети предвидени за 51.000. Бројот на самоубиства е во пораст, со 45 регистрирани случаи до 24 јули годинава, додека во 2024 биле забележани рекордни 91 самоубиства.
Алемано беше осуден во 2022 на една година и десет месеци затвор за нелегално финансирање на партија и трговија со влијание, како дел од пошироката истрага „Мафија Капитале“, која откри корупција при доделување тендери во Рим. Откако не ги почитувал условите за условна казна со општокорисна работа, судот одлучил да ја отслужи затворската казна.
Дури и зад решетки, Алемано продолжува со политиката, водејќи ја десничарската микро-партија „Независност!“, чија цел е излез на Италија од ЕУ.
