Главниот менаџер во компанијата која наводно превезувала руска воена опрема за војната во Украина е пронајден мртов. Павел Пчелников (52) беше директор за комуникации во Дигитална логистика, подружница на Руски железници. Неговото тело е пронајдено во средата во 6.30 часот по локално време на балконот од неговиот стан во центарот на Москва, објави локалниот весник „Московски комсомолец“.
Полицијата ја истражува смртта, а руските медиуми објавија дека природата на неговите повреди сугерира оти тој извршил самоубиство, без да се прецизира повеќе. Сепак, веб-страницата Топ Карго 200, која користи разузнавачки информации со отворен код за следење и објавување на смртта на високи руски офицери во нивната војна во Украина, објави дека Пчелников бил убиен од истрел од пиштол.
Топ Карго 200 рече дека Дигитална логистика наводно се обвинува за неуспехот да ја заштити инфраструктурата на руската железничка мрежа од хакери со седиште во Украина, што доведе до одложување на клучните залихи до руските трупи. Руската веб-страница Стархит објави како претходниот месец Пчелников бил на одмор од каде што споделувал слики, велејќи дека „она што го натерало човекот да направи очајнички чекор останува мистерија“.
Во извештајот на веб-страницата на руски јазик Реилвеј саплај се забележува дека тоа е последниот висок бизнисмен во земјата што починал, меѓу мистериозната смрт на голем број функционери од кои неколку се поврзани со енергетскиот гигант Газпром.
Во јули беше пронајдено телото на Јуриј Воронов со наводно прострелна рана во главата, пиштол во близина и чаури на дното од базенот во неговиот имот во Ленинградската област. 61-годишникот беше основач на транспортната и логистичка компанија Астра-шипинг, која беше вклучена во договорите на Газпром на Арктикот. Менаџерот на Газпром Леонид Шулман (60) беше пронајден мртов во јануари во бањата во куќа покрај белешка што ја наведе полицијата да верува дека тој починал од самоубиство, во селото Ленински во регионот на Ленинград. Во истото село, следниот месец беше пронајден мртов заменик-генералниот директор на Газпром на Унифицираниот центар за порамнување за корпоративна безбедност, Александар Тјуљаков. На 18 април, телата на Владислав Аваев, поранешен потпретседател на Гаспромбанк, како и неговата сопруга и ќерка, беа пронајдени мртви во нивниот стан во Москва. Во меѓувреме, во мај, Александар Субботин, милијардерот и поранешен главен менаџер на рускиот производител на нафта Лукоил, беше пронајден мртов во домот на шаман во Митишчи, североисточно од Москва, според извештаите на државните медиуми.
Оваа низа руски бизнисмени кои беа пронајдени мртви во невообичаени околности од почетокот на инвазијата на Украина, предизвика шпекулации за тоа дали убиствата се инсценирани за да изгледаат како самоубиства.
