Азербејџанскиот претседател Илхам Алиев денеска изјави дека патничкиот авион што се урна на 25 декември, при што загинаа 38 лица, бил оштетен со пукање од земја во Русија, и рече дека некои во Русија лажеле за причината за катастрофата. Претседателот Владимир Путин вчера му се извини на Алиев за „трагичниот инцидент“ во рускиот воздушен простор, откако руската противвоздушна одбрана стрелаше во украински беспилотни летала. Во соопштението на Кремљ не се наведува дека Русија го соборила авионот, туку само се истакнува дека е отворено кривично дело.

„Нашиот авион беше соборен случајно“, изјави Алиев за државната телевизија, додавајќи дека авионот претрпел некаков вид електронска блокада, а потоа бил пукано во него додека се приближувал кон јужниот руски град Грозни.

„За жал, во првите три дена слушнавме само апсурдни верзии од Русија“, рече Алиев, цитирајќи изјави во Русија кои ја припишуваат несреќата на птици или експлозија на некој вид кислородна боца.

„Бевме сведоци на јасни обиди да се прикрие ова прашање“, рече азербејџанскиот лидер, кој има блиски врски со Русија и се школувал на еден од врвните универзитети во Москва.

Алиев рече дека сака Русија да прифати дека е виновна за соборувањето на авионот и да ги казни одговорните за фаталното оштетување на авионот.

Путин и Алиев денеска имаа уште еден телефонски разговор, соопшти Кремљ, без да даде детали, но вчера рече дека и цивилните и воените специјалисти биле испрашувани за тоа што се случило.

Летот Ј2-8243 на „Азербејџан ерлајнс“ се урна како огнена топка во близина на градот Актау во Казахстан, откако се пренасочи од јужна Русија каде украинските беспилотни летала напаѓаа неколку градови. Исклучително реткото јавно извинување од Путин е најблиску што Москва дошла до прифаќање на одредена вина за катастрофата.