Доналд Трамп ја опиша денешната изјава на Владимир Путин за примирјето во Украина како многу ветувачка, но некомплетна.
Во првото обраќање по разговорите САД-Украина во Саудиска Арабија, рускиот претседател кажа дека го прифаќа предлогот за 30-дневно примирје, но само ако прекинот на огнот доведе до траен мир и ги отстрани основните причини за украинската криза.
„Путин даде многу ветувачка изјава, но таа не беше целосна. Се надеваме дека Русија ќе ја направи вистинската работа“, кажа Трамп, додавајќи дека многу би сакал да се сретне со Путин,
Тој кажа дека ќе биде многу разочаран како Русија не ги прифати предлозите за крај на војната.
„За многу детали од конечен договор веќе е разговарано. Разговаравме за украинските територии што ќе бидат задржани и изгубени, разговаравме за нуклеарна централа, многу голема нуклеарна централа и кој ќе ја добие. Разговаравме и за НАТО, но сите го знаеме одговорот за тоа, го знаеме веќе 40 години“, кажа Трамп по средбата со шефот на НАТО, Марк Руте.
Путин денеска изјави дека проблемот со предложеното примирје е што тоа би ѝ дало шанса на Украина да се вооружи и да преземе иницијатива во периодот кога Русија напредува на фронтот.
„Како што знаете, руските трупи напредуваат практично во секој сектор на фронтот. Значи, што би се случило во текот на тие 30 дена? Дали тоа би ѝ овозможило на Украина да продолжи со принудна мобилизација, снабдување со оружје и со обука на новомобилизираните единици или нема да го направи тоа?“, праша Путин.
