Владимир Путин им нареди на своите високи функционери да подготват нацрт-предлози за можно тестирање на нуклеарно оружје, што Русија не го направила од распадот на Советскиот Сојуз.

Наредбата е одговор на неодамнешната објава на Доналд Трамп дека САД ќе продолжат со тестирања и сигнал дека двете земји со најголемите нуклеарни арсенали на светот забрзано би можеле да ги засилат геополитичките тензии.

„Им давам инструкции на министерството за надворешни работи, министерството за одбрана, специјалните служби и на релевантните цивилни агенции да соберат дополнителни информации за ова прашање, да го анализираат во Советот за безбедност и да дадат предлози за евентуално започнување подготовки за тестови на нуклеарно оружје“, рече Путин на состанок на рускиот Совет за безбедност.

Односите помеѓу Русија и САД нагло се влошија во последните неколку недели откако Трамп го откажа планираниот самит со Путин во Будимпешта и воведе санкции за Русија за првпат откако се врати во Белата куќа во јануари.

Министерот за одбрана Андреј Белоусов му рече на Путин дека неодамнешните забелешки и дејствија на САД укажуваат дека е „препорачливо веднаш да се подготват за целосни нуклеарни тестови“.

„Тие би можеле да вршат на арктичкиот полигон во Новаја Земја“, кажа Белоусов.

„Ако не преземеме соодветни мерки сега, ќе се изгубат време и можности за навремен одговор на дејствијата на САД, бидејќи времето потребно за подготовка за нуклеарни тестови, во зависност од нивниот вид, се движи од неколку месеци до неколку години“, кажа шефот на генералштабот на руската војска Валери Герасимов.

Северна Кореја е единствената држава која извела атомски тестирања во 21. век, што последен пат се случи во 2017.

Портпаролот на Кремљ, Дмитри Песков, кажа дека Путин не дал конкретни термини за подготовка на предлозите.