Доналд Трамп изјави дека е сигурен дека Русија нема да ги нападне американските сојузници од НАТО. Запрашан дали Владимир Путин се согласил или се обврзал да се воздржи од таква офанзива, Трамп одговори:

„Имав добри разговори со него. Тој нема да напаѓа територија на НАТО“.

„Вол стрит џурнал“ и „Политико“ претходно објавија, повикувајќи се на неименувани извори, дека директорот на ЦИА, Џон Ретклиф, ја предупредил Русија да не напаѓа членки на НАТО за време на неговата посета на Москва оваа недела. Трамп одби да ги коментира медиумските извештаи во врска со целта на патувањето на Ретклиф.

„Не сакам да коментирам за тоа, но тие нема да нападнат“, тврди американскиот претседател.

Според „Политико“, директорот на ЦИА ја предупредил Русија да не го ескалира конфликтот, особено кон балтичките држави. Тој, исто така, наводно го повикал Кремљ да ја намали воената и финансиската поддршка за Иран.

Сепак, официјално е откриено многу малку за содржината на разговорите. Шефот на руската служба за надворешно разузнавање Сергеј Наришкин потврди дека се сретнал со Ретклиф, но не даде детали за тоа што било разговарано.

Кремљ ги отфрли извештаите за можни руски подготовки за напад врз НАТО како „хорор приказни“.