Владимир Путин изјави дека Украина извршила терористички напади против Русија и се закани со жестоки реакции ако продолжат.

На денешниот состанок на моќниот Безбедносен совет, Путин кажа дека Москва лансирала ракетни напади со долг дострел врз украинската енергетска, воена и комуникациска инфраструктура како одмазда за нападот на мостот кој ги поврзува Русија и Крим.

„Очигледно е дека украинските тајни служби го наредија, организираа и спроведоа терористичкиот напад кој имаше за цел да ја уништи клучната руска инфраструктура. Преку вакви акции, киевскиот режим застана рамо до рамо со најодвратните меѓународни терористички групи. Невозможно е да не се одговори на вакви напади“, кажа Путин.

Најмалку десет цивили загинаа, а 60-ина се повредени во денешните ракетни напади на Киев и други градови.

„Ако продолжат терористичките напади на наша територија, рускиот одговор ќе биде жесток. Никој не треба да се сомнева во тоа“, се закани Путин.

Тој ја обвини Украина и дека се обидела да изврши напади врз нуклеарна централа во Русија и гасоводот Турски тек.